洛溪大橋

白話廣州

  新聞話，洛溪大橋拓寬工程啲工人上個星期基本返到崗位，大橋嘅拓寬工程有望按計劃年底建成通車。

  喺上個世紀80年代，洛溪大橋就已經系番禺人民入廣州城區嘅重要途徑，喺嗰個仲要靠輪渡過海嘅年代，洛溪橋嘅出現可以講系劃時代嘅。諗起第一次過洛溪大橋，我系踩住單車過去嘅。經過洛溪大橋嗰陣，第一感覺就系佢好長，2.3公里嘅橋面真系踩到嗍曬氣。喺番禺呢邊落咗橋先睇到，呢條橋嘅橋墩仲好高，有成十幾層樓咁高。初初睇到，不禁驚嘆佢嘅特別同埋雄偉。

  2004年，我搬咗去番禺住，就日日同佢打交道啦。嗰時，洛溪大橋仲要收費，搭巴士過橋要俾多一蚊。隨住經濟發展，好多屋企都買咗私家車，番禺好多人都要去廣州城區返工，早晚高峰車流激增，所以比較容易塞車。好彩后嚟新光快速開通，分流咗唔少車輛。

  到咗2017年，洛溪大橋嘅收費站終于拆除，空出嚟嘅車道仲搞咗紅綠燈輪流放行，呢個常常逼成成鍋粥嘅交通堵點先至有明顯改善。但系，車流量實在太大，有時間唔中都會塞下。

  而家，洛溪大橋拓寬工程已經進行到近半，只要一完成，佢肯定會迎來更好嘅通行狀態。

◎阮栩 編輯