海山樓

白話廣州

  古代嘅廣州有四大崇樓，分別系鎮海樓、嶺南第一樓、拱北樓同埋海山樓。而家，就只剩低前面兩個。喺呢四座樓入邊，離海（江）最近嘅就系海山樓啦，因為佢真系見證過舊時廣州城可以睇海嘅事實。

  海山樓，其實就系而家北京路同東橫街嘅交界處。喺古代，佢嗰位置喺“鎮南門外”。《羊城古鈔》入邊記載話，海山樓嘅樓下系市舶亭，又話佢面對住“五洲”（而家嘅北京南路太平沙一帶）。

  海山樓系北宋嗰時建嘅。嗰陣時，廣州嘅海外貿易系相當活躍，經常有幾十個國家嘅商船同時嚟呢度。外國商船嚟廣州，就一定要泊喺市舶亭嗰度。按照當時嘅規矩，外國嘅貿易船第一次嚟，當地官員檢查完貨物之后要設宴招待，增進下感情。佢地離開嗰時，亦都要擺酒餞行。因為要款待遠道而嚟嘅客商，就建咗呢座海山樓。每年嘅10月，外國商船都要趁住東北風返去，臨走之前，廣州嘅地方官和同埋市舶司嘅官員，都要喺海山樓上邊大排筵席歡送。

  據地方志載，每年端午節要檢閱水軍，海山樓自然就成咗檢閱臺。因為佢獨特嘅地理位置，仲入選咗宋朝嘅“羊城八景”，叫做“海山曉霽”。每當雨過天晴，呢度嘅天空同江面都好似幅畫咁靚。可惜，海山樓喺元朝就被燒毀。而家，留返俾我哋嘅，只有呢個名字。

  ◎阮栩 編輯